ಲಕ್ನೋ: ರಾಮನವಮಿ ಹಿನ್ನೆಲೆಯಲ್ಲಿ ಅಯೋಧ್ಯೆ ರಾಮ ಮಂದಿರದಲ್ಲಿ ಭಕ್ತರ ಪ್ರವಾಹ, 50 ಲಕ್ಷ ಮಂದಿ ದರ್ಶನ ಪಡೆಯುವ ಸಾಧ್ಯತೆ
ಅಯೋಧ್ಯೆಯಲ್ಲಿ ರಾಮನವಮಿ ಹಬ್ಬದ ಹಿನ್ನೆಲೆಯಲ್ಲಿ, ಭಕ್ತರು ಸಾಗರೋಪಮವಾಗಿ ಹರಿದು ಬರುತ್ತಿದ್ದಾರೆ. ಇಂದು ಒಂದೇ ದಿನ ಸುಮಾರು ಐವತ್ತು ಲಕ್ಷ ಭಕ್ತರು ಬಾಲರಾಮನ ದರ್ಶನ ಪಡೆಯುವ ನಿರೀಕ್ಷೆಯಿದೆ.
ಭಕ್ತಜನರ ಭಾರೀ ಸೇರುವಿಕೆಯಿಂದ ಸಂಪೂರ್ಣ ನಗರದಲ್ಲಿ ಕಠಿಣ ಭದ್ರತೆ ಜಾರಿಗೊಳಿಸಲಾಗಿದೆ. ಕುಂಭಮೇಳದ ಮಾದರಿಯ ಭದ್ರತಾ ವ್ಯವಸ್ಥೆ ರೂಪುಗೊಂಡಿದ್ದು, ಡ್ರೋನ್‌ಗಳ ಮೂಲಕ ಮೇಲ್ನೋಟದ ಕಣ್ಗಾವಲು ನಡೆಸಲಾಗುತ್ತಿದೆ. ರಾಮನವಮಿಯ ಪ್ರಯುಕ್ತ ಶ್ರೀರಾಮನಿಗೆ ವಿಶೇಷ ಪೂಜೆಗಳು ನಡೆಯಲಿವೆ.
ಬೆಳಗ್ಗಿನಿಂದ ಮಧ್ಯಾಹ್ನದವರೆಗೆ ಎಲ್ಲಾ ವಿಶೇಷ ಪಾಸ್‌ಗಳನ್ನು ರದ್ದುಪಡಿಸಲಾಗಿದ್ದು, ಭಕ್ತರ ಪ್ರವೇಶವನ್ನು ನಿಯಂತ್ರಿಸಲಾಗಿದೆ. ದೇವಸ್ಥಾನ ಪರಿಸರ ಮತ್ತು ಸರಯೂ ನದಿ ತೀರದಲ್ಲಿ ಎನ್‌ಡಿಆರ್‌ಎಫ್ ಹಾಗೂ ಎಸ್‌ಡಿಆರ್‌ಎಫ್ ತಂಡಗಳನ್ನು ನಿಯೋಜಿಸಲಾಗಿದ್ದು, ಸುರಕ್ಷತೆಗೆ ಪೂರಕ ಕ್ರಮ ಕೈಗೊಳ್ಳಲಾಗಿದೆ.
ಮಧ್ಯಾಹ್ನ ವೇಳೆ ಬಾಲರಾಮನ ವಿಗ್ರಹದ ಮೇಲೆ ಸೂರ್ಯನ ಕಿರಣ ಬೀಳುವ ಅಪರೂಪದ ದೃಶ್ಯಾವಳಿ ನಡೆಯಲಿದ್ದು, ಅದನ್ನು ನೋಡಲು ಭಕ್ತರು ಉತ್ಸುಕತೆಯಿಂದ ಕಾಯುತ್ತಿದ್ದಾರೆ. ಸಂಜೆ ವೇಳೆ ಸರಯೂ ನದಿಯ ಪಕ್ಕದ ರಾಮಕೀ ಪೌಡಯಲ್ಲಿ ಸುಮಾರು ಎರಡು ಲಕ್ಷ ಹಣತೆಗಳನ್ನು ಬೆಳಗಿಸುವ ದರ್ಶನೀಯ ಕಾರ್ಯಕ್ರಮ ನಡೆಯಲಿದೆ.
