ಧಾರವಾಡ/ದಾವಣಗೆರೆ: ರಾಜ್ಯದಲ್ಲಿ ಹೃದಯಾಘಾತದಿಂದ ಸಂಭವಿಸುತ್ತಿರುವ ಸಾವಿನ ಪ್ರಕರಣಗಳು ದಿನೇದಿನೆ ಹೆಚ್ಚುತ್ತಿದ್ದು, ಮಂಗಳವಾರ ಧಾರವಾಡ ಮತ್ತು ದಾವಣಗೆರೆ ಜಿಲ್ಲೆಗಳಲ್ಲಿ ಸಂಭವಿಸಿದ ಪ್ರತ್ಯೇಕ ಘಟನೆಗಳಲ್ಲಿ ಇಬ್ಬರು ಪ್ರಾಣ ಕಳೆದುಕೊಂಡಿದ್ದಾರೆ. ಧಾರವಾಡದಲ್ಲಿ ಯುಪಿಎಸ್‌ಸಿ ಪರೀಕ್ಷೆಗಾಗಿ ತಯಾರಿ ಮಾಡುತ್ತಿದ್ದ ಯುವತಿ ಮೃತಪಟ್ಟರೆ, ದಾವಣಗೆರೆಯಲ್ಲಿ ಉದ್ಯಮಿಯ ಪುತ್ರ ಹೃದಯಾಘಾತದಿಂದ ಮೃತಪಟ್ಟಿದ್ದಾನೆ.
ಧಾರವಾಡದಲ್ಲಿ 26 ವರ್ಷದ ಜೀವಿತಾ ಕುಸಗೂರ ಹೃದಯಾಘಾತದಿಂದ ಸಾವು ಕಂಡ ಘಟನೆ
ಪೂರೋಹಿತ್ ನಗರ ನಿವಾಸಿಯಾದ 26 ವರ್ಷದ ಜೀವಿತಾ ಕುಸಗೂರ ಮಂಗಳವಾರ ಬೆಳಿಗ್ಗೆ ತಲೆಸುತ್ತು ಕಾಣಿಸಿಕೊಂಡ ಬಳಿಕ ಸುಸ್ತಾಗಿ ಕುಳಿತಿದ್ದರು. ಕುಟುಂಬದವರು ತಕ್ಷಣವೇ ಖಾಸಗಿ ಆಸ್ಪತ್ರೆಗೆ ಕರೆದೊಯ್ದರೂ, ಮಾರ್ಗಮಧ್ಯದಲ್ಲಿಯೇ ಅವರು ಪ್ರಾಣ ಬಿಟ್ಟಿದ್ದಾರೆ. ವೈದ್ಯರ ಪ್ರಕಾರ, ಹೃದಯಾಘಾತವೇ ಸಾವಿಗೆ ಕಾರಣವಾಗಿದೆ. ಎಂಎಸ್ಸಿ ಅಗ್ರಿಕಲ್ಚರ್ ಪೂರೈಸಿದ್ದ ಜೀವಿತಾ, ಐಎಎಸ್‌ ಅಧಿಕಾರಿಯಾಗುವ ಕನಸು ಹೊಂದಿದ್ದು, ಯುಪಿಎಸ್‌ಸಿ ಪರೀಕ್ಷೆಗೆ ತಯಾರಿ ನಡೆಸುತ್ತಿದ್ದರು. ಅವರು ಪ್ರಾಥಮಿಕ ಶಾಲಾ ಶಿಕ್ಷಕರಾದ ತಂದೆಯ ಕನಸನ್ನು ನೆರವೇರಿಸಲು ಪಣ ತೊಟ್ಟಿದ್ದರೂ, ದುರ್ಘಟನೆಯಿಂದ ಕನಸು ಒಡಹುಡಿದಂತಾಗಿದೆ.
ದಾವಣಗೆರೆಯಲ್ಲಿ 22 ವರ್ಷದ ಯುವಕ ಅಕ್ಷಯ್ ಹೃದಯಾಘಾತದಿಂದ ಸಾವು ಕಂಡ ಘಟನೆ
ದಾವಣಗೆರೆ ನಗರದ ಜಯನಗರದಲ್ಲಿದ್ದ 22 ವರ್ಷದ ಕಾಲೇಜು ವಿದ್ಯಾರ್ಥಿ ಅಕ್ಷಯ್ ಅಚಾನಕ ಮನೆಯಲ್ಲಿ ಕುಸಿದು ಬಿದ್ದಿದ್ದರು. ಕುಟುಂಬದವರು ಕೂಡಲೇ ಖಾಸಗಿ ಆಸ್ಪತ್ರೆಗೆ ಕರೆದೊಯ್ಯಲಾದರೂ, ಕೆಲವೇ ಕ್ಷಣಗಳಲ್ಲಿ ಆತನ ಸಾವು ಸಂಭವಿಸಿದೆ. ಉದ್ಯಮಿಯಾದ ರೇಖಾ ಮುರುಗೇಶ್ ಅವರ ಪುತ್ರನಾಗಿರುವ ಅಕ್ಷಯ್‌ನ ಹೃದಯಾಘಾತದ ಸಾವಿನಿಂದ ಸ್ಥಳೀಯರಲ್ಲಿ ಆತಂಕ ಮನೆಮಾಡಿದೆ.
