ಉಡುಪಿ: ನಿರಂತರ್ ಉದ್ಯಾವರ ಸಂಘಟನೆಯ ಎಂಟನೇ ವರ್ಷದ ಸಂಸ್ಥಾಪನಾ ಸಂಭ್ರಮದ ಅಂಗವಾಗಿ, ಉಡುಪಿ ಸಿಂಡಿಕೇಟ್ ಕ್ರೆಡಿಟ್ ಸೌಹಾರ್ದ ಕೊ-ಆಪರೇಟಿವ್ ಸೊಸೈಟಿ ಲಿಮಿಟೆಡ್ ಸಹಯೋಗದಲ್ಲಿ, ಮೂರು ದಿನಗಳ **’ನಿರಂತರ್ ಸಿನಿಮಾ ಉತ್ಸವ 2025’**ವನ್ನು ಆಯೋಜಿಸಲಾಗಿದೆ. ಈ ಉತ್ಸವದ ಪೋಸ್ಟರ್ ಬಿಡುಗಡೆ ಕಾರ್ಯಕ್ರಮ ಉಡುಪಿ अनुಗ್ರಹ ಪಾಲನ ಕೇಂದ್ರದಲ್ಲಿ ನಡೆಯಿತು.
ಈ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದ ಉಡುಪಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷ ಅತಿ. ವಂ. ಡಾ. ಜೆರಾಲ್ಡ್ ಐಸಾಕ್ ಲೋಬೊ ಅವರು, ನಿರಂತರ್ ಸಂಘಟನೆಯು ಹಲವು ವರ್ಷಗಳಿಂದ ಉಡುಪಿ ಜಿಲ್ಲೆಯಲ್ಲಿ ಕಲೆ ಹಾಗೂ ಸಾಹಿತ್ಯ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿರುವುದನ್ನು ಮೆಚ್ಚಿ, ಶುಭಾಶಯ ವ್ಯಕ್ತಪಡಿಸಿದರು.
ಆಗಸ್ಟ್ 8 ರಿಂದ 10ರವರೆಗೆ, ಉಡುಪಿ ಶೋಕ ಮಾತ ದೇವಾಲಯ ವಠಾರದಲ್ಲಿರುವ ಅವೇ ಮರಿಯ ಸಭಾಂಗಣದಲ್ಲಿ ನಡೆಯಲಿರುವ ಈ ಮೂರು ದಿನದ ಉತ್ಸವದಲ್ಲಿ, ಪ್ರತಿದಿನ ಸಂಜೆ 6:30ಕ್ಕೆ ಪ್ರಾರಂಭವಾಗುವ ಕಾರ್ಯಕ್ರಮಗಳಲ್ಲಿ ಆಕ್ಟ್ 1978, 19.20.21 ಮತ್ತು ಫೋಟೋ ಎಂಬ ಮೂರು ಸಾಮಾಜಿಕ ಕಳಕಳಿಯ ಕನ್ನಡ ಪ್ರಶಸ್ತಿ ವಿಜೇತ ಚಿತ್ರಗಳು ಉಚಿತ ಪ್ರವೇಶದೊಂದಿಗೆ ಪ್ರದರ್ಶಿಸಲಿವೆ.
ಕಾರ್ಯಕ್ರಮದ ಅಂಗವಾಗಿ, ಉಡುಪಿ ಧರ್ಮಪ್ರಾಂತ್ಯದ ಸಾಮಾಜಿಕ ಸಂಪರ್ಕ ಸಾಧನಗಳ ಆಯೋಗ ಮತ್ತು ಬೆಳ್ಳೆ ವಿಶನ್ ಡಾಟ್ ಕೊಮ್ ಸಹಯೋಗದಲ್ಲಿ, ಡಾ. ಎವ್ಜಿನ್ ಡಿ’ಸೋಜಾ ಮೂಡುಬೆಳ್ಳೆ ಅವರ “ಮೋಗ್ ಆನಿಂ ಬಲಿದಾನ್ (ಪ್ರೀತಿ ಮತ್ತು ಬಲಿದಾನ)” ಪುಸ್ತಕದ ಲೋಕಾರ್ಪಣೆಯೂ ಜರುಗಿತು.
ಈ ಸಂದರ್ಭದಲ್ಲಿ ವಿಶನ್ ಕೊಂಕಣಿ ಸಂಸ್ಥಾಪಕ ಮೈಕಲ್ ಡಿಸೋಜಾ, ಧರ್ಮಪ್ರಾಂತ್ಯದ ಸಂಪರ್ಕ ಆಯೋಗ ಸಂಚಾಲಕ ವಂ. ಡೆನಿಸ್ ಡೆಸಾ, ಲೇಖಕ ಡಾ. ಎವ್ಜಿನ್ ಡಿ’ಸೋಜಾ, ಬೆಳ್ಳೆ ವಿಶನ್ ಡಾಟ್ ಕೊಮ್ ಪ್ರವರ್ತಕ ಎಲಿಯಾಸ್ ಡಿಸೋಜಾ, ಕಿಟಾಳ್ ಅಂತರ್ಜಾಲ ಮಾಧ್ಯಮ ಸಂಪಾದಕ ಹೆಚ್. ಎಮ್. ಪೆರ್ನಾಲ್, ನಿರಂತರ್ ಸಂಘಟನೆಯ ಅಧ್ಯಕ್ಷ ರೋಷನ್ ಕ್ರಾಸ್ಟೊ, ಕಾರ್ಯದರ್ಶಿ ಒಲಿವಿರ ಮತಯಸ್, ಸ್ಥಾಪಕ ಅಧ್ಯಕ್ಷ ಸ್ಟೀವನ್ ಕುಲಾಸೊ, ಉಡುಪಿ ಸಿಂಡಿಕೇಟ್ ಸೌಹಾರ್ದ ಸೊಸೈಟಿಯ ಸ್ಥಾಪಕ ಜೀವನ್ ಡಿಸೋಜಾ ಮತ್ತು ಇನ್ನಿತರ ಗಣ್ಯರು ಉಪಸ್ಥಿತರಿದ್ದರು.
