ನಿಖರವಾಗಿ ಹೇಳಬೇಕೆಂದರೆ, ಧರ್ಮಸ್ಥಳದ ಸರಣಿ ಕೊಲೆ ಮತ್ತು ಅತ್ಯಾಚಾರ ಕೊಲೆ ಆರೋಪಿ ಚಿನ್ನಯ್ಯನನ್ನು ಬಂಧಿಸಿದ ನಂತರ, ಎಸ್‌ಐಟಿ ಅಧಿಕಾರಿಗಳು ಮುಂದಿನ ತನಿಖೆಯನ್ನು ನಡೆಸುತ್ತಿದ್ದಾರೆ. ಈ ಸಂದರ್ಭದಲ್ಲಿ, ಸೌಜನ್ಯರ ಮಾವ ವಿಠ್ಠಲ ಗೌಡ ನೀಡಿದ ಮಾಹಿತಿಯ ಆಧಾರದ ಮೇಲೆ ಬಂಗ್ಲೆ ಗುಡ್ಡದಲ್ಲಿ ಮಹಜರ್ (ಅಧಿಕೃತ ಸರ್ವೆ) ನಡೆಸಲಾಗಿದೆ.
ಸೆಪ್ಟೆಂಬರ್ 6ರಂದು ಎಸ್‌ಐಟಿ ಅಧಿಕಾರಿಗಳು ಬಂಗ್ಲೆ ಗುಡ್ಡಕ್ಕೆ ಭೇಟಿ ನೀಡಿದಾಗ ಎರಡು ಅಸ್ಥಿಪಂಜರಗಳು ಪತ್ತೆಯಾದವು ಎಂದು ತಿಳಿದುಬಂದಿತ್ತು. ಆದರೆ, ಈಗ ‘ಬೆಂಗಳೂರು ಪೋಸ್ಟ್’ ವೆಬ್‌ಸೈಟ್‌ ನಡೆಸಿದ ವರದಿಯ ಪ್ರಕಾರ, ಆ ಸ್ಥಳದಲ್ಲಿ ಕೇವಲ ಎರಡಲ್ಲ, ಹಲವಾರು ಅಸ್ಥಿಪಂಜರಗಳು ಸಿಕ್ಕಿವೆ ಎಂದು ತಿಳಿಸಲಾಗಿದೆ.
ಪತ್ತೆಯಾದ ಮೂಳೆಗಳಲ್ಲಿ ಕೆಲವು ಹಳೆಯವಾಗಿವೆ. ಆದರೆ, ಎಫ್‌ಎಸ್‌ಎಲ್ (ಫೋರೆನ್ಸಿಕ್ ಸೈನ್ಸ್ ಲ್ಯಾಬೊರೇಟರಿ) ವರದಿ ಬಂದ ನಂತರ ಮಾತ್ರ ಮೂಳೆಗಳು ಎಷ್ಟು ಹಳೆಯವು ಎಂಬ ವಿವರ ನಿಖರವಾಗಿ ತಿಳಿಯಲು ಸಾಧ್ಯವಿದೆ. ಈ ಸ್ಥಳದಲ್ಲಿ ಕೆಲವು ಮೂಳೆಗಳು ನೆಲದ ಮೇಲೆಯೇ ಪತ್ತೆಯಾಗಿದ್ದು, ಹೆಣಗಳನ್ನು ಸರಿಯಾಗಿ ಹೂತಿಡದೆ, ಸ್ವಲ್ಪ ಮಣ್ಣು ಮುಚ್ಚಿ ಹಾಕಿರಬಹುದು ಎಂದು ಅಂದಾಜಿಸಲಾಗಿದೆ.
ಸಂಪೂರ್ಣ ಅಸ್ಥಿಪಂಜರ ಸಿಗುವಂತಹ ಸಂದರ್ಭದಲ್ಲಿ, ಅದರಿಂದ ಲಿಂಗ, ವಯಸ್ಸು, ಎತ್ತರ ಮತ್ತು ಕೆಲವೊಮ್ಮೆ ಸಾವಿನ ಕಾರಣವನ್ನೂ ಕೂಡ ಗುರುತಿಸಬಹುದು. ಅಸ್ಥಿಪಂಜರವನ್ನು ಕಾಣೆಯಾದ ವ್ಯಕ್ತಿಯೊಂದಿಗೆ ಹೋಲಿಸಿ ನೋಡಲು, ಕಾಣೆಯಾದ ವ್ಯಕ್ತಿಯ ಸಂಬಂಧಿಯ ಡಿಎನ್ಎಯೊಂದಿಗೆ ಹೋಲಿಕೆ ಮಾಡುವ ಪ್ರಕ್ರಿಯೆಯನ್ನು ಅನುಸರಿಸುತ್ತಾರೆ. ದೇಹವನ್ನು ಹೂತಿಟ್ಟ ಮಣ್ಣಿನ ಸ್ವರೂಪವನ್ನು ಅವಲಂಬಿಸಿ, ಅಸ್ಥಿಪಂಜರವು ಸಂಪೂರ್ಣವಾಗಿ ಕೊಳೆತು ಹೋಗಲು ಒಂದರಿಂದ ಮೂರು ತಿಂಗಳವರೆಗೆ ಸಮಯ ತೆಗೆದುಕೊಳ್ಳುತ್ತದೆ ಎಂದು ಹೆಸರಾಂತ ವಿಧಿವಿಜ್ಞಾನ ತಜ್ಞರು ತಿಳಿಸುತ್ತಾರೆ.
