ಹಾಸನ: ಹಾಸನ ತಾಲೂಕಿನ ಕಟ್ಟಾಯ ಗ್ರಾಮದಲ್ಲಿ ಬುಧವಾರ ಸಂಭವಿಸಿದ ಒಂದು ಉಲ್ಲೇಖನೀಯ ಘಟನೆಯಲ್ಲಿ, 12 ಅಡಿ ಉದ್ದದ ಕಾಳಿಂಗ ಸರ್ಪದೊಂದಿಗೆ ನಡೆದ ಭೀಕರ ಹೋರಾಟದಲ್ಲಿ, ಮಾಲೀಕರ ಮಕ್ಕಳನ್ನು ರಕ್ಷಿಸಿ ಶ್ವಾನವು ಪ್ರಾಣ ತ್ಯಜಿಸಿದೆ.
ಶಮಂತ್ ಎಂಬುವವರ ತೋಟದಲ್ಲಿ ಪಿಟ್‌ಬುಲ್ ಮತ್ತು ಡಾಬರ್‌ಮನ್ ತಳಿಯ ನಾಯಿಗಳನ್ನು ಪೋಷಿಸಲಾಗುತ್ತಿತ್ತು. ಪಿಟ್‌ಬುಲ್ ಶ್ವಾನಕ್ಕೆ ಭೀಮಾ ಎಂಬ ಹೆಸರಿಟ್ಟಿದ್ದರು. ತೋಟದಲ್ಲಿ ಕೆಲಸಗಾರರು ತಮ್ಮ ಕೆಲಸ ನಿರ್ವಹಿಸುತ್ತಿರುವಾಗ, ಅಚಾನಕ್‌ 12 ಅಡಿ ಉದ್ದದ ಕಾಳಿಂಗ ಸರ್ಪ ಪ್ರವೇಶಿಸಿತು. ಆ ಸಮಯದಲ್ಲಿ ಮಕ್ಕಳು ತೋಟದಲ್ಲಿ ಆಟವಾಡುತ್ತಿದ್ದು, ಸರ್ಪವು ತೆಂಗಿನ ಮರಗಳ ಕೆಳಗೆ ಅಡಗಿತು. ಇದನ್ನು ಗಮನಿಸಿದ ನಾಯಿಗಳು, ಅದನ್ನು ಹೊರತೆಗೆದು ಹೋರಾಟ ಆರಂಭಿಸಿವೆ.
ನಾಯಿಗಳ ಆರ್ಭಟದ ಶಬ್ಧ ಕೇಳಿದ ಶಮಂತ್ ತಕ್ಷಣವೇ ಹೊರಗೆ ಬಂದು ಪರಿಸ್ಥಿತಿಯನ್ನು ನಿಯಂತ್ರಿಸಲು ಪ್ರಯತ್ನಿಸಿದರು. ಆದರೆ, ಭೀಮಾ ತನ್ನ ಹೋರಾಟವನ್ನು ನಿಲ್ಲಿಸದೆ, ಹಾವಿನ ವಿರುದ್ಧ ತೀವ್ರವಾಗಿ ಸೆಣಸಾಡಲು ಮುಂದಾಗಿದೆ. ಸುಮಾರು ಹದಿನೈದು ನಿಮಿಷಗಳ ಕಾದಾಟದ ಬಳಿಕ, ಭೀಮಾ ಶ್ವಾನ 12 ಅಡಿ ಉದ್ದದ ಸರ್ಪವನ್ನು ಮೂರು ತುಂಡುಗಳಾಗಿ ವಿಭಜಿಸಿ ಕೊಂದಿತು. ಆದರೆ, ಈ ಹೋರಾಟದಲ್ಲಿ ಭೀಮಾ ಹಾವು ಕಚ್ಚಿದ ಪರಿಣಾಮ ಗಂಭೀರವಾಗಿ ಗಾಯಗೊಂಡು ಸಾವನ್ನಪ್ಪಿದೆ. ಆದರೆ, ಮತ್ತೊಂದು ನಾಯಿ ಯಾವುದೇ ಗಾಯವಿಲ್ಲದೆ ಬದುಕುಳಿದಿದೆ.
ಈ ಅಪರೂಪದ ದೃಶ್ಯವನ್ನು ಸ್ಥಳೀಯ ನಿವಾಸಿಯೊಬ್ಬರು ತಮ್ಮ ಮೊಬೈಲ್ ಕ್ಯಾಮೆರಾದಲ್ಲಿ ಸೆರೆಹಿಡಿದು, ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿದ ಪರಿಣಾಮ ಅದು ವೈರಲ್ ಆಗಿದೆ.
ಭೀಮಾ ಅತ್ಯಂತ ಶ್ರೇಷ್ಠ ತಳಿಯ ಶ್ವಾನವಾಗಿದ್ದು, ಹಲವು ಡಾಗ್ ಶೋಗಳಲ್ಲಿ ಬಹುಮಾನಗಳೂ ಗೆದ್ದಿತ್ತು ಎಂದು ಮಾಲೀಕ ಶಮಂತ್ ತಿಳಿಸಿದ್ದಾರೆ.
