ಜೂನ್ 1ರಿಂದ ಜುಲೈ 31ರವರೆಗೆ ಕರಾವಳಿ ತೀರದಲ್ಲಿ ಮೀನುಗಾರಿಕೆಗೆ ನಿಷೇಧ
ಕರ್ನಾಟಕದ ಕರಾವಳಿ ತೀರದಲ್ಲಿ ಈ ವರ್ಷದ ಜೂನ್ 1ರಿಂದ ಜುಲೈ 31ರವರೆಗೆ ಮೀನುಗಾರಿಕೆಗೆ ನಿಷೇಧ ವಿಧಿಸಲಾಗಿದೆ. ಈ ಅವಧಿಯಲ್ಲಿ ಎಲ್ಲಾ ರೀತಿಯ ಯಾಂತ್ರಿಕ ದೋಣಿಗಳು ಮತ್ತು 10 ಅಶ್ವಶಕ್ತಿಯ (Horse Power) ಮೀರುವ ಮೋಟಾರ್‌ನೊಂದಿಗೆ ಬಳಸುವ ದೋಣಿಗಳ ಮೂಲಕ ಮೀನುಗಾರಿಕೆ ನಡೆಸುವುದು ಅನುಮತಿಯಲ್ಲ.
ಆದರೆ, ಕೇವಲ 10 ಅಶ್ವಶಕ್ತಿಯವರೆಗೆ ಸಾಮರ್ಥ್ಯವಿರುವ ಮೋಟಾರ್ ಇಂಜಿನ್‌ಗಳೊಂದಿಗೆ ಬಳಸುವ ದೋಣಿಗಳಲ್ಲಿಯೂ ಮೀನನ್ನು ಹಿಡಿಯದೇ, ದೋಣಿಯನ್ನು ಸಾಗಿಸಲು ಮಾತ್ರ ಬಳಸುವುದಕ್ಕೆ ಅವಕಾಶ ಇದೆ. ಇತರೆ ನಾಡದೋಣಿಗಳ ಮೂಲಕ ಮೀನುಗಾರಿಕೆ ನಡೆಸಲು ಕೂಡ ಅನುಮತಿ ನೀಡಲಾಗಿದೆ.
ನಿಷೇಧಾವಧಿಯಲ್ಲಿ ಮೀನುಗಾರಿಕೆ ನಡೆಸಿದರೆ, ಕರ್ನಾಟಕ ಕಡಲ ಮೀನುಗಾರಿಕೆ ಕಾಯ್ದೆ 1986ರ ಪ್ರಕಾರ ಕ್ರಮ ಕೈಗೊಳ್ಳಲಾಗುತ್ತದೆ. ನಿಷೇಧ ಉಲ್ಲಂಘಿಸಿದ ದೋಣಿಗಳು ಮತ್ತು ಮೀನುಗಾರರಿಗೆ ಒಂದು ವರ್ಷ ಅವಧಿಗೆ ಸರ್ಕಾರ ನೀಡುವ ತೆರಿಗೆ ರಹಿತ ಡೀಸೆಲ್ ಸೌಲಭ್ಯ ದೊರೆಯದು.
ಮೀನುಗಾರರು ಈ ನಿಯಮಗಳನ್ನು ಪಾಲಿಸಿ ಸಹಕರಿಸಬೇಕು ಎಂದು ಮೀನುಗಾರಿಕೆ ಜಂಟಿ ನಿರ್ದೇಶಕರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
